Drama apsurda

So dva galženjaki,

sami najpre, a potlam

Temdvemi

Išče dva k coj

Vu priču skupdeti

jen vu se zavupan, tri f tenjo

vupreti

(si štiri za jenga, te jeden za se!)

se zišli, praf štiri

na broj

kak vandravci dijaki

i fušmudrijaši

jen z drugem jednaki (pri deli

pri zdeli)

zanavek, zasigdar

od ve si pajdaši.

- I kaj velite – jen pita – smo si?

- Jen, dva, tri, štiri... Smo skoro. Nam samo

prijatel Godot još fali.

Tak: jen z drugem, drug' z tretjem

(i štrti još k coj!)

v krugohodenje

kak cajnger na vreme raspeti: odido,

se zido nazaj, si štiri

pajdaši

kak kumi i brati (za jenga, za se!)

sištiri...

- Kak štiri? A peti? – Fali.

- Šter peti? – Am zna se,

kak navek: kum-brat naš Godot!

- Vre de da de.

- Je praf tu rekel se ziti nam bo?

- Je je.

...

So tri komendrijaši (i štrti

skupžnjimi, jen boži

hrmak)

se sreli,

jen z drugem se

zmeli,

vunziti z norije ne znali

sim-tam-obernaši.

Ovak (bi rekli)

semštirim zgledi:

išče jen

peti (zamuđač i fkanjivec)

jim sikak

fali!

- Viš ve! A lepo je rekel sigurno da de.

- A što?

- Praf kak i fčera, zablivec ti sveti:

gospon Godot!

- A je!

Tak so te štiripajdaši

Matijaši, Jandraši, Štefi, Tomaši

zašnapsali jutro (se trefila nekak

karta pak stol);

popoldan kak tat se posmeknul

v tišini

(na brajdi je dudal veter

v samini

tokato i fugo od Bacha, d-mol)

i več se z daljine narinula kmica

je jeden zakričal v zgublenemu

dnevu,

v drfteči nigdini:

- Bog dragi, kaj ve?

- Je dimo vre iti – zašeptal je

drugi – skorom bo noč.

- A kaj je to dimo... i

je li moč... ali je ne?

- Čuješ, mu sveca, ja niš

ne razmem!

- Sim dojdi, ti tetec,

kaj ti povem: Godot je rekel

sigurno da de.

- A je!